रायपुर, 04 अगस्त 2017। पर्यटन मंत्री दयालदास बघेल ह आज कहिन कि पर्यटन मेला मन ले टूर, ट्रेवल अऊ टूरिज्म व्यवसाय ल बढ़ावा मिलही। पर्यटन मेला म पर्यटन म रूचि रखइया मन ल ट्रेवल एजेंट, अऊ टूर आपरेटर्स मन ल एके जघा म पर्यटन स्थल मन के पूरा जानकारी मिलत हे। श्री बघेल ’एक भारत श्रेष्ठ भारत’ योजना के तहत रायपुर के अम्बुजा माल म छत्तीसगढ़ पर्यटन मंडल अऊ गुजरात टूरिज्म निगम कोति ले आयोजित पर्यटन मेला के शुभारंभ के बरेा म कार्यक्रम ल सम्बोधित करिन। 4 ले 6 जुलाई तक आयोजित ए पर्यटन मेला म देश के कई ठन राज्य मन के पर्यटन विभाग मन अपन राज्य के पर्यटन स्थल अउ पर्यटन सुविधा मन के जानकारी दे बर एक प्रदर्शनी लगाए गए हे, जेमां छत्तीसगढ़, गुजरात, मध्यप्रदेश, हिमाचल प्रदेश, झारखंड अऊ तेलंगाना राज्य मन के पर्यटन विभाग मन कोति ले स्टाल लगाए गए हे, जिहां पर्यटन म रूचि रखइया मनखे जानकारी प्राप्त कर सकत हें। पर्यटन मेला म राज्य मन के टूर आपरेटर्स अऊ ट्रेवल एजेंट घलोक हिस्सा लेवत हें।
पर्यटन मेला म गुजरात राज्य के लोक कलाकार मन ह शानदार डांडिया नाच करके पर्यटन मंत्री दयालदास बघेल के स्वागत करिन। श्री बघेल ह कलाकार मन अऊ हस्त शिल्पी मन ले मुलाकात करिन अऊ उंखर उत्साह बढ़ाइन। श्री बघेल ह कहिन कि 'एक भारत श्रेष्ठ भारत’ प्रधानमंत्री श्री नरेन्द्र मोदी के महत्वाकांक्षी योजना आए। येमां देश के कई ठन राज्य मन के कला संस्कृति, खेलकूद, शिक्षा, लोक नृत्य, गायन, कृषि, पर्यटन के जानकारी ल जाने अऊ समझे बर कई ठन कार्यक्रम आयोजित करे जात हे। श्री बघेल ह बताइन कि ’एक भारत श्रेष्ठ भारत’ योजना के तहत छत्तीसगढ़ अऊ गुजरात राज्य के संग पेयरिंग करे गए हे, जेखर तहत दुनों राज्य मन के बीच सांस्कृतिक कार्यक्रम मन, पर्यटन मेला अउ आन कई ठन कार्यक्रम मन के आयोजन करे जात हे। एखर ले दुनों राज्य मन के मनखे मन ल एक दूसरे के राज्य के खान-पान, संस्कृति, खेलकूद, कृषि, पर्यटन, शिक्षा अऊ आन बात ल जाने-समझे के अवसर मिलही।
ए मेला म पर्यटन क्षेत्र म काम करइया संस्था ब्लू आई इंडिया प्राईवेट लिमिटेड कोति ले सहयोग करे जात हे। मेला के शुभारंभ कार्यक्रम म छत्तीसगढ़ पर्यटन मंडल के प्रबंध संचालक श्री एम.टी. नंदी संग टूर आपरेटर्स, ट्रेवल एजेंट, हस्तशिल्पि अउ नागरिक मन बढ़ संख्या म उपस्थित रहिन।
