- काम म लापरवाही: कोण्डागांव के जिला आबकारी अधिकारी पैकरा निलंबित
- मदिरा के अवैध परिवहन अउ बिक्री म कड़ा निगरानी रखे के निर्देश
रायपुर, 04 अगस्त 2017। वाणिज्यिक कर (आबकारी) मंत्री श्री अमर अग्रवाल ह आज राजधानी स्थित आबकारी भवन म विभागीय काम-काज के गहन समीक्षा करिन। उमन प्रदेश म मदिरा दुकान मन के निरधारित समय म सही ढंग ले संचालन संग मदिरा के अवैध परिवहन अउ बिक्री म कड़ा निगरानी रखे बर विभागीय अधिकारी मन ल सख्त निर्देश दीन। संगेच मदिरा के निरधारित दर ले जादा मूल्य म बिक्री अउ मिलावट आदि के खिलाफ घलोक कड़ा कार्रवाई बर निर्देशित करिन। वाणिज्यिक कर मंत्री श्री अग्रवाल ह समीक्षा के बेरा कोण्डागांव जिला के जिला आबकारी अधिकारी श्री जी.आर. पैकरा के मुख्यालय ले हमेशा गायब रहे के शिकायत ल गंभीरता ले लीन अऊ ओ मन ल आजेच तुरते निलंबन के आदेश दीन। ओ मन ल निलंबित करत निलंबन अवधि म जिला आबकारी अधिकारी श्री पैकरा के मुख्यालय सहायक आयुक्त आबकारी कार्यालय दुर्ग निरधारित करे गए हे।
वाणिज्यिक कर मंत्री श्री अग्रवाल ह आगू सबो जिला आबकारी अधिकारी मन ल मदिरा दुकान मन के सही ढंग ले संचालन सुनिश्चित करे बर विशेष जोर दीन। एखर बर उमन मदिरा दुकान मन म कार्यरत अइसन बेचइया अउ सुपरवाईजर मन ल तीन दिन के भीतर तुरंते हटा देहे के निर्देश दीन, जऊन जुन्ना शराब ठेकेदार मन ले संबद्ध होवंय। श्री अग्रवाल ह अवगत कराइन कि ए कर्मचारि मन के संगेच मदिरा म मिलावट आदि के शिकायत मिलत हे। एला रोके बर अइसन कर्मचारी मन ल हटाना जरूरी हे। श्री अग्रवाल ह मदिरा दुकान मन म कार्यरत कर्मचारी मन के स्थानांतरण म ए सूचना तुरंत राज्य के विभागाध्यक्ष कार्यालय अऊ संबंधित जिला आबकारी अधिकारी ल देहे बर घलोक निर्देश दीन। उमन मदिरा के अवैध परिवहन अउ बिक्री म रोकथाम बर राज्य अऊ संभाग स्तरीय उड़नदस्ता दल मन ल मदिरा दुकान के सतत रूप ले निरीक्षण करे बर निर्देशित करिन। एखर अलावा सबो जिला आबकारी अधिकारी मन ल घलोक अपन-अपन क्षेत्र म लगतार भ्रमण करत ये मां निगरानी रखे के निर्देश दीन।
श्री अग्रवाल ह बैठक म मदिरा दुकान मन म आहाता निर्माण अऊ उपयोग अउ सीसी टी.वी. के संचालन व्यवस्था के बारे म समीक्षा करिन। एखर अलावा उमन सबो मदिरा दुकान मन के ऑडिट रिपोट के जानकारी लीन। ए दौरान श्री अग्रवाल ह सबो दुकान मन म पक्का देयक व्यवस्था बर प्रिंटर अऊ स्केनर आदि के लउहे इंतजाम सुनिश्चित करे बर घलोक जरूरी निर्देश दीन। बैठक म बताए गीस कि विभाग कोति ले मदिरा ले संबंधित कोनो शिकायत बर टोल फ्री नं. - 14405 संचालित हे। ये मां अब तक 309 शिकायत प्राप्त होए हे। जेमा जादा शिकायत निरधारित दर ले जादा मूल्य म मदिरा के बिक्री आदि ले संबंधित हे। ए अवसर म आबकारी विभाग के आयुक्त श्री अशोक अग्रवाल संग विभागीय अधिकारी उपस्थित रहिन।
