परिवहन मंत्री के अध्यक्षता म राज्य सड़क सुरक्षा परिषद के बैठक
राजधानी म नवा ऑटो वाहन मन के खरीदी बर परमिट के मनाही: ई-रिक्शा ल बढ़ावा
करिया शीशा वाले वाहन मन उपर होही कड़ी कार्रवाई
रायपुर, 25 जुलाई 2017। लोक निर्माण अऊ परिवहन मंत्री श्री राजेश मूणत के अध्यक्षता म आज नवा रायपुर स्थित मंत्रालय (महानदी भवन) म राज्य सड़क सुरक्षा परिषद के बैठक लेहे गीस । श्री मूणत ह इहां यातायात सुरक्षा के उपाय मन म परिवहन अउ पुलिस आदि संबंधित विभाग मन ल प्रभावी अमल सुनिश्चित करे के निर्देश दीन। ए अवसर म उमन ये निर्देशित करिन कि दुर्घटना ग्रस्त मनखे के शासकीय हो या निजी अस्पताल, उहां घटना स्थल के नजदीक के कोनो चिकित्सा केन्द्र म ओखर तुरंत उपचार शुरू कर दे जाय। ये मां कोनो कारन या कागजात आदि के बारे म पूछ-ताछ मत करे जाय। बैठक म परिवहन विभाग के सचिव श्री अरूण देव गौतम, आबकारी विभाग के आयुक्त श्री अशोक अग्रवाल, लोक निर्माण विभाग के विशेष कर्तव्यस्थ अधिकारी श्री अनिल राय संग संबंधित विभागीय अधिकारी उपस्थित रहिन।
श्री मूणत ह बैठक म सड़क दुर्घटना मन के रोकथाम बर यातायात सुरक्षा के पालन म विशेष जोर दीन। उमन ओव्हर लोड़िंग, ओव्हर स्पीडिंग, नशा या मोबाइल ले बात करत वाहन चालन अऊ खतरनाक अउ उल्टा दिशा म वाहन चलइया के खिलाफ विशेष अभियान चलाके कड़ा कार्रवाई करे के निर्देश दीन। ए तारतम्य म उमन बिना हेलमेट वाले दुपहिया वाहन चालक अऊ काला शीशे वाले वाहन मन के विरूद्ध सख्त कार्रवाई बर जरूरी निर्देश दीन। उमन एमां कोनो लापरवाही पाए जाय म संबंधित वाहन चालक के ड्रायविंग लाइसेंस के निलंबन या निरस्तीकरण के कार्रवाई घलोक सुनिश्चित करे के निर्देश दीन। श्री मूणत ह आगू सुरक्षा के खातिर जागरूकता बर पुलिस अऊ परिवहन विभाग के संगें-संग आन संबंधित विभाग मन ल घलोक जुर के काम करे बर कहिन। उमन एखर तहत सड़क किनारे लगे होर्डिग म यातायात सुरक्षा संबंधी स्लोगन ले जादा ले जादा प्रचार-प्रसार सुनिश्चित करे के निर्देश दीन। एखर अलावा स्पीड ब्रेकर मन म मापदण्ड के पालन अऊ संकेतक चिनहा के सही ढंग ले प्रदर्शन बर विभागीय अधिकारी मन ल निर्देशित करिन। श्री मूणत ह विभागीय अधिकारी मन ल वाहन मन के नम्बर प्लेट म नम्बर के स्पष्ट रूप ले अंकन सुनिश्चित करे बर घलोक जरूरी निर्देश दीन। उमन दुर्घटना के रोकथाम बर सड़क मारग के ब्लेक स्पॉट के चिन्हांकन अऊ ओमां शीघ्रता ले सुधार आदि के कार्रवाई बर निर्देशित करिन।
श्री मूणत ह वाहन मन के प्रदूषण जांच बर सतत रूप ले अभियान चलाए जाय के निर्देश दीन। ये मां सुविधा ल ध्यान म रखत हर एक पेट्रोल पंप म प्रदूषण जांच केन्द्र के स्थापना बर जरूरी निर्देश दीन। उमन जांच केन्द्र ले गलत सर्टिफिकेट जारी होए म संबंधित के खिलाफ जरूरी कार्रवाई बर निर्देशित दीन। श्री मूणत ह कहिन कि राजधानी ल स्वच्छ अऊ सुन्दर बनाए बर विशेष जोर देहे जात हे। एखर तहत रायपुर नगर म ई-रिक्शा ल बढ़ावा देहे जात हे। इहां पर्यावरण ल ध्यान म रखत अब नवा ऑटो वाहन मन के खरीदी बर परमिट नइ देहे जाय। ए दौरान श्री मूणत ह स्कूल बस मन के सुरक्षा व्यवस्था, यात्री वाहन मन म जीपीएस के व्यवस्था अऊ कई ठन मारग मन म सुरक्षा बर उपाय आदि के संबंध म विस्तार ले चर्चा करिन।
