काम मन म गति लाय बर अधिकारी मन मौका के करव सतत निरीक्षण: श्री मूणत
रायपुर, 03 जुलाई 2017। लोक निर्माण मंत्री श्री राजेश मूणत ह आज नया रायपुर के संगें-संग राजधानी के भ्रमण करिस अऊ इहां विभाग के अंतर्गत निर्माणाधीन कार्य मन के मौके म जाके सघन निरीक्षण करिस। उमन निर्माण कार्य मन म तेजी लाय बर विभाग के उप अभियंता ले लेके प्रमुख अभियंता ल मौका निरीक्षण बर सख्त निर्देश दीन। श्री मूणत ह एमां राजधानी रायपुर म कई ठन कार्य मन स्काई वॉक अउ कोटा स्टेडियम, रेल्वे अण्डर ब्रिज गोगांव संग कई ठन मार्ग मन के चौड़ीकरण अऊ नया रायपुर म लोक निर्माण के विभागाध्यक्ष भवन के प्रगति के जानकारी लीन।
श्री मूणत ह रायपुर शहर म निर्माणाधीन रेल्वे ओव्हर अउ अण्डर ब्रिज अऊ सड़क मन के चौड़ीकरण म धीमी प्रगति म नाराजगी व्यक्त करन अऊ संबंधित अधिकारी मन ल तगड़ा फटकार घलोक लगाईन। उमन एमां खासकर शंकर नगर रेल्वे ओव्हर ब्रिज, गोगांव रेल्वे अण्डर ब्रिज, काशीराम नगर फ्लाई ओव्हर, रामनगर कोटा नगर अऊ गुढ़ियारी-गोंदवारा मार्ग, आमापारा ले गुढ़ियारी मार्ग के चौड़ीकरण म अपेक्षित गति लाय बर अधिकारी मन ल सख्त निर्देश दीन।
श्री मूणत ह आज सबले पहिली रायपुर शहर के शास्त्री चौक म स्काई वॉक के निर्माण के निरीक्षण करिस। उमन कहिन कि ए निर्माण के समय यातायात बाधित झन होवय, एकर विशेष ध्यान रखव। उमन स्काई वॉक निर्माण म गुणवत्ता के संग पूरा करे बर हमेशा एक उप अभियंता के ड्यूटी लगाय के घलोक निर्देश दीन। आम जनता के सुविधा अऊ सुगम यातायात बर शास्त्री चौक म शास्त्री चौक ले जिला अउ सत्र न्यायालय भवन के तरफ, कलेक्टर कार्यालय के तरफ, घड़ी चौक के तरफ, डी के अस्पताल, मोतीबाग चौक के तरफ अउर अम्बेडकर अस्पताल के तरफ स्काई वॉक के निर्माण करे जात हे। एखर कुल लम्बाई एक हजार 495 मीटर हे। एखर निर्माण म 45 करोड़ 81 लाख रूपिया के लागत आही।
श्री मूणत ह आगू कोटा स्टेडियम म निर्माणाधीन कार्य मन के निरीक्षण करिस। ये काम अवइया 30 सितमबर तक पूरा कर ले जाही। राजधानी रायपुर म खेल सुविधा मन के विस्तार बर कोटा म स्थित जुन्ना स्टेडियम ल एथलेटिक खेल मन के सुविधा बर विस्तार कार्य करे जात हे। एखर ले स्टेडियम म दौड़, बाधादौड़ बर एथलेटिक ट्रैक के सुविधा के संगे-संग लंबी कूद, ऊंची कूद, भाला फेक, गोला फेक, चक्र फेक आदि खेल मन बर घलोक ट्रैक फिल्ड के व्यवस्था हो जाही। कोटा स्टेडियम म 400 मीटर 8-लेन के सिंथेटिक ट्रैक निर्माण अउ पेवेलियन भवन के निर्माण करे जात हे। एखर अलावा दो नग बैडमिंटन कोर्ट अऊ एक नग फुटबाल मैदान के निर्माण करे जात हे।
श्री मूणत ह आज नया रायपुर स्थित सेक्टर 19 म लोक निर्माण के निर्माणाधीन विभागध्यक्ष भवन के घलोक निरीक्षण करिस। करीबन साढ़े 21 करोड़ रूपिया के लागत ले बनत विभागध्यक्ष भवन के निर्माण कार्य पूरा होवईया हे। ए अवसर म छत्तीसगढ़ सड़क विकास प्राधिकरण के प्रबंध संचालक श्री अनिल राय अऊ लोक निर्माण विभाग के विभागीय अधिकारी उपस्थित रहिन।
