कई ठन हितग्राही मूलक योजना मन के तहत जादा ले जादा प्रकरण स्वीकृत करे के निर्देश

मुख्य सचिव के अध्यक्षता म राज्य स्तरीय बैंकर्स समिति के बैठक

रायपुर, 29 जून 2017। मुख्य सचिव श्री विवेक ढांड के अध्यक्षता म आज इहां मंत्रालय (महानदी भवन) म राज्य स्तरीय बैंकर्स समिति के बैठक आयोजित करे गीस। बैठक म श्री ढांड ह शासन के कई ठन हितग्राही मूलक योजना मन के तहत हितग्राही मन के बैंक खाता मन ल आधार सीडिंग अउ मोबाईल नम्बर ले जोड़े के निर्देश दीन। उमन कहिन कि कई ठन योजना मन के तहत हितग्राही मन ल देहे जात सहायता राशि के तुरंते भुगतान बैंकों के माध्यम ले हो सकय। एखर खातिर शत-प्रतिशत ऊंखर बैंक खाता मन ल आधार अउ मोबाईल ले जोड़े जाए। श्री ढांड ह अंत्योदय स्वरोजगार योजना, आदिवासी स्वरोजगार योजना, राष्ट्रीय ग्रामीण अउ शहरी आजीविका मिशन, प्रधानमंत्री रोजगार सृजन कार्यक्रम, प्रधानमंत्री घर योजना संग कई ठन हितग्राही मूलक योजना के तहत ऋण प्रकरन मन के समीक्षा करिन। उमन ए योजना मन के तहत जादा ले जादा प्रकरन मन ल स्वीकृत करे अऊ ऋण-अनुदान देके लाभान्वित करे के निर्देश दीन। उमन चालू वित्तीय साल 2017-18 के निरधारित लक्ष्य के शत-प्रतिशत उपलब्धि हासिल करे बर घलोक बैंक मन ल निर्देश दीन। श्री ढांड ह ग्रामीण क्षेत्र मन अउ अनुसूचित क्षेत्र मन के बैंक शाखा मन म बहुत मात्रा म नगद राशि के उपलब्धता सुनिश्चित करे के निर्देश बैक अधिकारी मन ल दीन। उमन राज्य के दूरस्थ ग्रामीण अंचल मन म सहकारी बैंक के शाखा खोले अऊ बैंक मित्र बनाए उपर घलोक जोर दीन।

बैठक म बताए गीस कि प्रधानमंत्री जन-धन योजना के तहत 31 मई 2017 तक एक करोड़ 23 लाख 82 हजार खाता खोले गए हे। एमां ले 87 लाख 56 हजार खाता आधार ले जुड़ गए हे। प्रधानमंत्री जीवन ज्योति बीमा योजना के तहत नौ लाख 48 हजार, प्रधानमंत्री सुरक्षा बीमा योजना के तहत 41 लाख 67 हजार अऊ अटल पेंशन योजना के तहत 78 हजार मनखे मन सामिल करे गए हें। प्रधानमंत्री मुद्रा योजना के तहत वित्तीय साल 2016-17 म तीन लाख 19 हजार मनखे मन ल 1897 करोड़ रूपिया के राशि स्वीकृत करे गीस। बैठक म प्रधानमंत्री फसल बीमा योजना अउ स्टैण्ड-अप इंडिया योजना के प्रगति के घलोक समीक्षा करे गीस। बैठक म अपर मुख्य सचिव कृषि श्री अजय सिंह, अपर मुख्य सचिव पंचायत अउ ग्रामीण विकास श्री एम.के. राउत, प्रमुख सचिव वित्त श्री अमिताभ जैन, भारत सरकार वित्त मंत्रालय के संयुक्त सचिव श्री अमित अग्रवाल, सचिव खाद्य श्रीमती ऋचा शर्मा, सचिव पंचायत अउ ग्रामीण विकास श्री पी.से. मिश्रा, सचिव महिला अउ बाल विकास डॉ. एम.गीता, विशेष सचिव वित्त डॉ. कमलप्रीत सिंह, विशेष सचिव नगरीय प्रशासन डॉ. रोहित यादव, विशेष सचिव आदिम जाति अउ अनुसूचित जाति विकास सुश्री रीनाबाबा साहेब कंगाले संग कई ठन विभाग मन के वरिष्ठ अधिकारी अऊ भारतीय रिजर्व बैंक, भारतीय स्टेट बैंक, नाबार्ड संग कई ठन बैंकों के वरिष्ठ अधिकारी उपस्थित रहिन।