कोरबा म सिरजन के साहित्यकार सम्मेलन अउ पुस्तक विमोचन

कोरबा, 4 फरवरी 2018। कोरबा के वरिष्ठ साहित्यकार लालजी साहू "लाल छत्तीसगढ़िया" कोति ले मिले खबर के मुताबिक छत्तीसगढ़ी ल आठवीं अनुसूची मे सामिल कराके राजभासा बनवाय खातिर समरपित लोक कला अउ साहित्य संस्था सिरजन, छत्तीसगढ़ इकाई कोरबा जिला के स्थापना दिवस के उपलक्छ म तारीक 4 फरवरी 2018, इतवार के दिन पद्मश्री पं. मुकुटधर पान्डे साहित्य भवन म साहित्यकार सम्मेलन आयोजित होइस।
सम्मेलन के माई पहुना रहिन छत्तीसगढ़ राजभासा आयोग के अध्यक्छ डाक्टर विनय पाठक, संसदीय सचिव विधायक कटघोरा लखन लाल देवाँगन, लोक कला साहित्य संस्था सिरजन छत्तीसगढ़ के अध्यक्छ डाक्टर दीनदयाल साहू।
सम्मेलन मे पहिली सत्र म संस्था के छत्तीसगढ़ अध्यक्छ डाक्टर दीनदयाल साहू जी के पुस्तक विमोचन होइस संगे संग वोखर बारे मे चरचा अउ समीक्छा करे गीस।
माई पहुना मन के दुवारा "लोक ब्यवहार अउ कारयालय मन मे छत्तीसगढ़ी " उपर परिचरचा होइस।

सम्मेलन के दूसर सत्र म जुरियाय सब्बो साहित्यकार मन के दुवारा सुघ्घर सुघ्घर गीत , गजल , कविता के पाठ होइस। ये आयोजन म सहयोगी पहुना रहिन- कोसाध्यक्छ राज कुमार यादव गरियाबंद, कमलेश यादव, संतराम साहू राजनाँदगाँव।