मुख्यमंत्री युवा स्वावलंबन योजना: डॉ. रमन सिंह ह करिस नतीजा के घोसना

रोजगार बर उद्योग मन के जरूरत के मुताबिक करे जाही पढ़ईया लईका मन के क्षमता के विकास: डॉ. रमन सिंह
छत्तीसगढ़ देश के पहला राज्य जऊन हर जारी करिस पढ़ईया लईका मन के एम्प्लॉयबिलिटी रिपोट
एमकेट परीक्षा म अव्वल अवइया पढ़ईया लईका मन ल मुख्यमंत्री ह दीन प्रमाण पत्र
‘चिप्स के फेसबुक पेज म करे गीस परीक्षा परिणाम के घोसना’
‘रोजगार के अवसर मन म वृद्धि बर राज्य शासन के पहल’
मुख्यमंत्री ह फेसबुक लाइव म दीस पढ़ईया लईका मन ल संदेश

रायपुर, 29 जून 2017। मुख्यमंत्री डॉ. रमन सिंह ह आज इहां अपन निवास कार्यालय ले चिप्स के फेसबुक पेज https://www.facebook.com/CHiPSCgGov/ म मुख्यमंत्री युवा स्वावलंबन योजना के अंर्तगत आयोजित एमकेट परीक्षा के परिणाम घोषित करिन। ए अवसर म एमकेट परीक्षा म बैंचमार्क नम्बर पवइया पहिली क्रम के पढ़ईया लईका मन ल शुभकामना देवत मुख्यमंत्री डॉ. रमन सिंह ह कहिन कि सफल पढ़ईया लईका मन बर प्रतिष्ठित कम्पनी मन म सीधा रोजगार प्राप्त करे के ये सुअवसर ये। डॉ. सिंह ह कहिन कि बैंचमार्क नम्बर ले कम प्राप्त करईया पढ़ईया लईका मन ल निराश होए के जरूरत नइ हे। अइसन पढ़ईया लईका मन ल राज्य शासन कोति ले जुलाई महिना ले प्रशिक्षण देके ऊंखर रोजगार प्राप्त करे के योग्यता (Employablity) ल बढ़ाए जाही, ताकि उमन ल घलोक रोजगार प्राप्त करे के अवसर मिलय। ए योजना के संग राज्य शासन ह पढ़ईया लईका मन के कौशल के विश्लेषण करके उद्योग मन के जरूरत के मुताबिक उंखर क्षमता के विकास करही।

ए अवसर म मुख्यमंत्री डॉ. रमन सिंह ह चिप्स कोति ले बनाये गये State Employability Report के विमोचन घलोक करिस। ए अवसर म कौशल विकास मंत्री श्री प्रेमप्रकाश पाण्डेय, मुख्य सचिव श्री विवेक ढांड, अपर मुख्य सचिव श्री एन.बैजेन्द्र कुमार, सूचना प्रौद्योगिकी अऊ इलेक्ट्रॉनिक्स विभाग के प्रमुख श्री अमन कुमार सिंह, मुख्यमंत्री के सचिव श्री सुबोध कुमार सिंह, जनसंपर्क विभाग के संयुक्त सचिव श्री राजेश सुकुमार टोप्पो, चिप्स के मुख्य कार्यपालन अधिकारी श्री एलेक्स पॉल मेनन, मुख्यमंत्री के संयुक्त सचिव श्री मुकेश बंसल संग संबंधित विभाग मन के वरिष्ठ अधिकारी उपस्थित रहिन।

कार्यक्रम म मुख्य सचिव श्री विवेक ढांड ह कहिन कि रोजगार बर पढ़ईया लईका मन के कौशल के उन्नयन म ये योजना काफी सहायक साबित होही। इलेक्ट्रॅानिक्स अउ सूचना प्रौद्योगिकी विभाग के प्रमुख सचिव श्री अमन सिंह ह बताइस कि राज्य म बहुत अकन प्रमुख राष्ट्रीय शिक्षण संस्थान जइसे- आई.आई.टी., एम्स, एन.आई.टी., एच.एन.एल.यू., ट्रिपल आई.टी, आई.आई.एम. आदि के उपस्थिति के कारण छत्तीसगढ़ ह खुद ल देश म एजुकेशन हब के रूप म स्थापित कर लेहे हे। फेर राज्य के स्नातक पास होए पढ़ईया लईका मन अऊ रोजगार पवइया पढ़ईया लईका मन के संख्या के बीच अंतर हे। ए अंतर ल खतम करे बर राज्य शासन ह छत्तीसगढ़ मुख्यमंत्री युवा स्वावलंबन योजना चालू करे हे। एखर से रोजगार के अवसर मन म वृद्धि होही। ये देखे गए हे कि सूचना प्रौद्योगिकी अउ सूचना प्रौद्योगिकी समर्थित सेवा मन के क्षेत्र म नियोक्ता रोजगार देहे के पहिली छात्र मन ल अपन तकनीकी जरूरत के मुताबिक कौशल प्रदान करे बर प्रशिक्षण देवत हे। इही बात ल ध्यान रखत राज्य शासन ह उद्योग मन के जरूरत के मुताबिक पढ़ईया लईका मन के रोजगार प्राप्त करे के योग्यता (Employablity) ल बढ़ाए के निर्णय लेहे हे। छत्तीसगढ़ मुख्यमंत्री युवा स्वावलंबन योजना के संचालन ले राज्य के प्रतिभा मन ल तकनीकी रूप ले दक्ष करत छत्तीसगढ़ के विश्वसनीयता स्थापित करे के प्रयास करे जात हे। एखर से अवइया समय म बहुत अकन कम्पनी मन रोजगार के अपन जरूरत मन के पूर्ति बर छत्तीसगढ़ आए म विचार करहीं। छत्तीसगढ़ मुख्यमंत्री युवा स्वावलंबन योजना के जानकारी देवत चिप्स के मुख्य कार्यपालन अधिकारी श्री एलेक्स पॉल मेनन ह बताइस कि ए साल करीबन 30 हजार पढ़ईया लईका मन के मूल्यांकन करके 5 हजार ल प्रशिक्षण देहे जाना प्रस्तावित हे। अभी हाल म ए योजना मं 12 हजार इंजीनियरिंग अउ गैर-इंजीनियरिंग पढ़ईया लईका मन ल सम्मिलित करे गए हे।

राज्य शासन के प्रयास हे कि प्रशिक्षण कार्यक्रम म हिस्सा लेहे छात्र मन ले जादा ले जादा बर रोजगार के अवसर देवाए जाए। ए योजना के माध्यम ले प्रशिक्षित जनशक्ति देहे ले स्थानीय आईटी/आईटीईएस उद्योग ल घलोक अऊ जादा गति मिलही। प्रशिक्षण प्राप्त करत छात्र मन ले आन पढ़ईया लईका मन ल घलोक तकनीकी कौशल बढ़ाए के प्रेरणा मिलही।